Халықаралық балаларды қорғау күніне орай Алматы маңындағы «Oi-Qaragai» таулы курорты әлеуметтік бастама аясында балалар үйінің тәрбиеленушілеріне мерекелік шара ұйымдастырды. «Ковчег» және «SOS» балалар үйінен келген 100-ге жуық бала тау бөктерінде демалып, түрлі ойын-сауыққа қатысты деп хабарлайды Qazaqtoday.info сайты.
Ұйымдастырушылардың айтуынша, мерекелік бағдарлама аясында балалар атқа мініп, арқан саябағынан өтіп, тауға шығу секілді белсенді демалыс түрлерімен айналысқан. Сонымен қатар, олар үшін арнайы пикник пен «апорт-от» ойыны ұйымдастырылды. Шараның басты мақсаты – қиын жағдайдағы балаларға қамқорлық көрсетіп, олардың қоғамның толыққанды мүшесі екенін сезіндіру.
Бұл бастама Қазақстандағы бизнестің корпоративтік-әлеуметтік жауапкершілігінің бір көрінісі ретінде қарастырылуда. Компания өкілдері мұндай шаралар арқылы тек қайырымдылық жасап қана қоймай, елімізде отбасы институтын нығайту және қамқорлық мәдениетін қалыптастыруға үлес қосуды көздейтінін атап өтті.
Сарапшылардың пікірінше, мұндай әлеуметтік жобалар еліміздегі туризм саласында отбасылық құндылықтарды насихаттауға ықпал етеді. Осылайша, демалыс орындары тек сервис ұсынатын орын ғана емес, сонымен қатар қоғамдық маңызы бар әлеуметтік алаңға айналуда. Себебі, мықты отбасы – тұрақты қоғамның негізі болып саналады.
