Елімізде жыл басынан бері 44 бала терезеден құлап кеткен
Фото: pixabay
Қазақстанда жыл басынан бері 44 бала терезеден құлап кетті, деп хабарлайды QazaqToday.info ақпараттық порталы.
Денсаулық сақтау министрлігінің мәліметі бойынша, оның 4-еуі көз жұмған. Әсіресе оқыс жағдай Атырау, Маңғыстау облыстарында және Астанада жиі болатынын атап өтті.
«Атырау облысында – 13, Астана қаласында– 8, Маңғыстау облысында –4 бала құлап кеткен», – дейді министрлік.
Жазатайым оқиғалардың негізгі себептері:
- балаларды қараусыз қалдыру;
- жауапкершілікті үлкен балаларға жүктеу;
- терезелерде қорғаныш құрылғыларының болмауы;
- терезе маңында баланың өздігінен шығуына мүмкіндік беретін жиһаздың орналасуы;
- москит торларын сенімді қорғаныс ретінде қате қабылдау.
Министрлік ата-аналарға балаға мұқият қарау қажеттігін ескертті.
