Мемлекет басшысы: Жаңа Ата Заң – Әділетті Қазақстанның төлқұжаты

Фото: Ақорда

Президент жаңа Конституцияны ұлттың сапалы жаңғыруының негізі деп атап, оның қағидаттары ел тәуелсіздігін нығайтып, Әділетті Қазақстан құруға бағытталғанын мәлім етті. Бұл туралы QazaqToday.info ақпараттық порталы хабарлайды.

«Жаңа Конституцияны қабылдау – ұлттың жаңа сапасын қалыптастыру деген сөз. Бұл – дұрыс пен бұрысты тани білетін, жақсы мен жаманның ара-жігін ажырата алатын, кемеліне жеткен жұрттың ғана қолынан келетін іс.

Жаңа Конституция елдігіміздің тірегі, егемендігіміздің тұғыры болады. Оның әр нормасы, әр тармағы Тәуелсіздігімізді нығайта түседі.

Әділдік қағидаты бас құжаттың өзегіне айналды. Сондықтан жаңа Ата заңды Әділетті Қазақстанның төлқұжаты десек, қателеспейміз.

Мен ел Президенті және Конституция кепілі ретінде бас құжаттағы ережелердің мүлтіксіз орындалуы үшін бар күш-жігерімді саламын.

Жаңа Конституциямызға сәйкес адал қызмет етуге серт беремін.

Еліміз әрқашан өсіп-өркендей берсін!

Қасиетті Отанымыз – Қазақстан Республикасы мәңгі жасасын!», — деді Қ. Тоқаев Конституцияны қабылдауға арналған салтанатты жиында.