Алматыда «әдемі» нөмірлердің бағасы белгілі болды: Қандай сандар сұраныста?

Алматыда көлікке «әдемі» нөмір таңдау қызметі іске қосылғалы бері 19 мыңнан астам өтініш түсті, деп хабарлайды Qazaqtoday ақпарат агенттігі.

Бұл жаңалық туралы Алматы қаласының Өңірлік коммуникациялар қызметінде өткен брифингте қалалық Полиция департаменті Әкімшілік полиция басқармасының бастығы Серік Шумаев мәлімдеді. Бұдан былай автокөлік иелері мемлекеттік нөмірді автоматты түрде алып қана қоймай, қолда бар комбинациялардың ішінен өздеріне ұнағанын таңдай алады.

Серік Шумаевтың айтуынша, бұл қызмет азаматтарға таңдау құқығын беріп, процестің ашықтығын қамтамасыз етеді. Сондай-ақ бұл бастама – мемлекеттік қызметтерді цифрландыру бағдарламасының бір бөлігі.

«Мемлекеттік нөмірлердің бірнеше санаты бар. Олардың құны 10-нан 280 айлық есептік көрсеткішке (АЕК) дейін жетеді. Баға көлік иесі таңдаған сандық немесе әріптік комбинацияға байланысты болады. Сатылымнан түскен қаражат толығымен қала бюджетіне аударылады. Қазір үш бірдей саннан тұратын немесе басында не соңында нөлі бар нөмірлерге сұраныс өте жоғары», – деді Серік Шумаев.

Қазіргі таңда нөмір таңдау қызметі мамандандырылған халыққа қызмет көрсету орталықтарында (ХҚКО) қолжетімді. Алдағы уақытта бұл процесті электрондық үкімет порталы мен мобильді қосымшалар арқылы онлайн жүргізу жоспарланып отыр.

Алайда кез келген әріптік-сандық комбинацияға рұқсат етілмейді. Әдепсіз немесе жағымсыз мағына беретін нөмірлерді жасауға тыйым салынған.

«Әріптік және сандық комбинациялар жалпы қабылданған моральдық нормаларға сай болуы керек. Яғни, балағат сөздер немесе біреудің ар-намысы мен қадір-қасиетіне нұқсан келтіретін жазуы бар нөмірлерге жол берілмейді. Барлығы әдеп аясында болуы тиіс», – деп түсіндірді Алматы қалалық Полиция департаментінің ресми өкілі Салтанат Әзірбек.

Бұл өзгерістер тек азаматтарға қызмет көрсету сапасын жақсартып қана қоймай, «Заң және тәртіп» қағидатын қамтамасыз ету үшін де маңызды. Нақты есепке алу мен ашық рәсімдер жол қауіпсіздігін арттыруға септігін тигізеді.

Фото: Әлеуметтік желіден