«Қанға боялған жайылым»: Қарағанды облысында 17 жылқыны атып тастаған фермер күдікке ілінді

Қарағанды облысының Нұра ауданында бұрын-соңды болмаған оқиға тіркелді. Заречное ауылының маңында 17 жылқының өлексесі табылып, 14-і оқ жарақатынан қаза болғаны анықталды, деп хабарлайды Qazaq Today ақпарат порталы.

Куәгерлердің сөзінше, жергілікті фермер көлікпен жайылымға кіріп, жылқыларды қуып жүріп, шетінен атқан. «Сафари» тәрізді бұл әрекет ауыл тұрғындарын шошытқан. Оқиғадан кейін күдікті оқиға орнынан ізін суытқан.

Малынан айырылған шаруалар енді әділдік талап етуде. Олардың айтуынша, күдікті — өңірде беделді, бай-манаптардың бірі, ірі жер иесі. «Бай болса, бәрі кешіріледі деп ойлай ма? Біз ең болмаса шындық орнағанын қалаймыз», — дейді ауыл тұрғындарының бірі.

Қарағанды облыстық полиция департаментінің мәліметінше, бұл дерек бойынша Қылмыстық кодекстің 202-бабы («Бөтеннің мүлкін әдейі жою немесе бүлдіру») бойынша іс қозғалған. Күдікті ретінде 53 жастағы Нұра ауданының тұрғыны ұсталып, уақытша ұстау изоляторына жеткізілген.

Қазір барлық мән-жай анықталып жатыр. Тергеу амалдары басталған.

«Бөтеннің мүлкіне қол сұғу, қоғамдық тәртіпті бұзу секілді заңсыз әрекеттерге жол берілмейді. Мұндай фактілер қатаң түрде тоқтатылады», — деп мәлімдеді Қарағанды облыстық Полиция департаментінің баспасөз қызметі.

Ал жергілікті тұрғындар істің әділ тергелуін талап етіп отыр. Олар бұл қылмыстың жабылып қалуынан қауіптенеді.

«Біздің ауылда кедейдің малы өліп жатса, ешкім мән бермейді. Ал бай адамның аты аталса, бәрі үнсіз қалады. Біз бұл жолы үндемейміз», — дейді ауыл тұрғыны.