Жолдағы камералар 82,8 млрд теңге айыппұл салды

Қазақстанда 2025 жылдың қаңтар-тамыз айларында автоматты тіркеу жүйесі жол қозғалысы ережесін бұзудың 7,2 миллион фактісін тіркеді. Айыппұлдың жалпы сомасы 82,8 млрд теңгені құрады, деп хабарлайды Azattyq Rýhy Бірінші кредит бюросына сілтеме жасап.

ҚР Бас прокуратурасы Құқықтық статистика және арнайы есепке алу жөніндегі комитетінің мәліметінше, өткен жылдың сәйкес кезеңімен салыстырғанда заң бұзушылықтар саны 25 пайызға артқан.

Олардың көпшілігі жылдамдықты арттыруға байланысты болды – 4,3 миллион жағдай (+7% ж/ж), сондай-ақ жол белгілері мен таңбаларын елемеу – 2 миллион жағдай (+46% ж/ж). Олар жалпы заң бұзушылықтың 89%-ға жуығын құраған.

«Әкімшілік құқық бұзушылық туралы кодекстің «Тоқтау немесе тұраққа қою ережелерін бұзу» (+128%, 447 мыңға дейін) және «Бағдаршамның қызыл түсіне өтіп кету» (+183%, 361 мыңға дейін) баптары бойынша да айтарлықтай өсім байқалды. Есепке алынған фактілердің 11%-ы соларға тиесілі», — деп хабарлады Бас прокуратура.

82,8 млрд теңге айыппұлдың 70,2 млрды өндірілді.

Ведомствожаңа түзетулерге байланысты ауыр салмақты жүктерді тасымалдауға бақылау күшейтілгенін атап өтті: жыл басынан бері салмақ параметрінен асып кетуге байланысты 5 мыңнан астам жағдай тіркелген.

Билік 2026 жылға қарай автоматты тіркеу жүйесін кеңейтіп, автоматты салмақ өлшеу кешендерінің санын 50-ден 220-ға дейін көбейтуді жоспарлап отыр.