Елордада бюджеттен 500 млн теңге жымқырғандар ақшасын қайтарды
Астана қаласының прокуратурасы мемлекет мүддесін қорғау мақсатында ірі жемқорлық ісін әшкерелеп, бюджет қаражатының орнын толтыруға қол жеткізді. Halyq Uni порталының хабарлауынша, елордадағы аудандық соттың үкімі бойынша ветеринариялық бақылау және қадағалау саласында жұмыс істеген бұрынғы уәкілетті қызметкерлер мемлекеттік сатып алу саласында заңсыз әрекеттер жасағаны үшін сотталған.
Бұл істің аясында аталған қызметкерлердің қылмыстық әрекеттері мемлекетке 526 миллион теңгеден астам шығын келтірген. Астана прокуратурасы шығынды қайтару мақсатында азаматтық талап арыз беріп, сот осы талапты қанағаттандырды. Нәтижесінде, жауапкерлерден мемлекетке келтірілген шығын толық өндірілді, ал сот шешімі заңды күшіне енді.
Бұл іс елдегі мемлекеттік сатып алу жүйесінің ашықтығын қамтамасыз ету және заңбұзушылықтарды болдырмау қажеттігін тағы да көрсетті.
