Инфляция 9,2%-ға төмендеді: азық-түлік бағасы тұрақталып келе ме?

Қазақстанда инфляция деңгейі 9,2%-ға дейін төмендеді. Бұл туралы ҚР Ұлттық экономика вице-министрі Азамат Амрин мәлімдеді. Оның айтуынша, елде инфляцияны төмендету бойынша жүйелі жұмыс жүргізіліп жатыр.

Бұл туралы Qazaqtoday.info сайты хабарлайды.

Вице-министрдің дерегінше, өткен жылы инфляцияның ең жоғары деңгейі 12,6%-ды құраған. Ал биылғы жылдың тоғыз айының қорытындысы бойынша бұл көрсеткіш 9,3%-ға дейін төмендеген. 1 қарашадағы мәлімет бойынша, инфляция 9,2%-ды құрады.

Азамат Амрин инфляцияның баяулауына негізінен азық-түлік тауарлары бағасының өзгеруі әсер еткенін атап өтті. Оның сөзінше, әлеуметтік маңызы бар азық-түлік өнімдерінің бағасын тұрақтандыру бағытында тиісті шаралар қабылданып жатыр.

Атап айтқанда, тамыз, қыркүйек және қазан айларында азық-түлік бағасының айлық көрсеткіші 0,1%-ға төмендеген.

Сонымен қатар, ақылы қызметтер тарифтерін реттеу мәселесі Үкімет пен Ұлттық банктің бірлескен жоспары аясында қарастырылып жатыр.