Қазақстан 2030 жылы футзалдан Еуропа чемпионатын өткізуге үміткер
Қазақстан 2030 жылы футзалдан Еуропа чемпионатын өткізуге ресми өтінім берді. Турнирге Испания, Хорватия, Франция, Финляндия, Грузия және Польша да үміткер.
Сурет: UEFA
Қазақстан 2030 жылы футзалдан Еуропа чемпионатын қабылдауға ниет білдірген елдер қатарына қосылды. Қазақстан футбол федерациясы құрлықтық додаға қожайын болу үшін ресми өтінім берді. Турнирді өткізу құқығы үшін еліміз тағы алты мемлекетпен бәсекелеседі.
Бұл туралы Qazaqtoday.info сайты хабарлайды.
Еуропалық футбол қауымдастықтары одағының (УЕФА) мәліметінше, 2030 жылғы Еуропа чемпионатын ұйымдастыруға қызығушылық танытқан мемлекеттердің саны рекордтық көрсеткішке жеткен.
Қазақстаннан бөлек, турнирді өткізуге Испания, Хорватия, Франция, Финляндия, Грузия және Польша ниет білдірген. Осылайша, футзалдан Еуропа чемпионатын қабылдау құқығына барлығы жеті мемлекет таласады.
УЕФА бекіткен талаптарға сәйкес, үміткер елдер турнирді ұйымдастыруға қатысты соңғы өтінімдерін 2027 жылғы 8 маусымға дейін тапсыруы тиіс. Бұл құжаттарда спорттық инфрақұрылым, жарыс өткізілетін ареналар, командаларды орналастыру және чемпионатты ұйымдастыруға қажетті басқа да мәселелер қамтылады.
Ал 2030 жылғы футзалдан Еуропа чемпионатын қабылдайтын ел 2027 жылдың қыркүйегінде анықталады.
