Мерей Базарбаев 23 жасқа дейінгі әлем чемпионатында алтын медаль жеңіп алды
Қазақстандық балуан Мерей Базарбаев Лас-Вегаста өткен 23 жасқа дейінгі әлем чемпионатында еркін күрестен 57 келіге дейінгі салмақта алтын медаль жеңіп алды.
Сурет: ҰОК
Лас-Вегаста өтіп жатқан 23 жасқа дейінгі спортшылар арасындағы әлем чемпионатында қазақстандық балуан Мерей Базарбаев еркін күрестен 57 келіге дейінгі салмақта топ жарды. Ол финалда түркиялық Бекир Кесерді жеңіп, әлем чемпионы атанды.
Бұл туралы Qazaqtoday.info сайты хабарлайды.
Жарыс барысында отандасымыз бірнеше мықты қарсыласынан басым түсті. Ширек финалға дейін ол америкалық Люк Лилледальды 3:1 есебімен ұтты. Кейін франциялық Расул Галбураевты 13:2 есебімен жеңіп, жартылай финалда жапониялық Дайто Кацумэден 7:0 есебімен басым түсті.
Осылайша, қазақстандық балуан әлем чемпионатының алтын жүлдесін иеленді.
