Мәскеу – Астана рейсінде тәртіп бұзған жолаушы 12 тәулікке қамалды
Мәскеу – Астана рейсінде ұшақ бортында тәртіп бұзған 36 жастағы шетел азаматы 12 тәулікке қамауға алынды. Көлік полициясы оқиға мән-жайын анықтады.
Фото: Air Astana
Мәскеу – Астана бағытындағы рейс бортында тәртіп бұзған жолаушы 12 тәулікке қамауға алынды. Бұл туралы Stan.kz ақпарат агенттігі хабарлайды.
Бұл туралы Qazaqtoday.info сайты хабарлайды.
Әуе кемесі Астана әуежайына қонған соң ер адам акт бойынша көліктегі полиция басқармасының қызметкерлеріне тапсырылды.
«Көлік полицейлері 36 жастағы шетел азаматын алкогольдік масаң күйде болғанын және қоғамдық тәртіпті бұзғанын анықтады. Ол әуе кемесі экипажының талаптарын орындамай, басқа жолаушылардың ар-намысына тиетін балағат сөздер айтқан», – деді көліктегі полиция департаменті бастығының орынбасары Құрмет Мәжікенов.
Сот шешімімен шетел азаматы 12 тәулікке қамауға алынды.
Сонымен қатар жолаушының бұған дейін де, бір жыл ішінде алкогольдік ішімдік ішкені үшін жауапкершілікке тартылғаны анықталды.
Көліктегі полиция департаментінің қызметкерлері әуе кемесінің борты – жауапкершілігі жоғары аймақ екенін қатаң түрде еске салады.
Еске салсақ, осыған дейін ресейлік әйел Air Astana әуе компаниясының Тбилиси – Алматы – Дананг бағыты бойынша рейсте 3400 долларын (1,5 млн теңге) жоғалтқанын жазғанбыз.
