Тоқаев Үндістан Премьер-министрі Модимен кездесті
Қасым-Жомарт Тоқаев Үндістан Премьер-министрі Нарендра Модимен кездесіп, БРИКС саммитінің табысты өтуімен құттықтады және қазақ-үнді қарым-қатынасының қарқынды дамуын атап өтті.
Фото: Ақорда
Мемлекет басшысы Қасым-Жомарт Тоқаев Үндістан Премьер-министрі Нарендра Модимен кездесу өткізді. Бұл туралы Ақорда хабарлады.
Бұл туралы Qazaqtoday.info сайты хабарлайды.
Кездесу барысында Президент Үндістан Премьер-министрі Нарендра Модиді БРИКС саммитінің табысты өтуімен құттықтады. Ол халықаралық ауқымдағы іс-шараның жоғары деңгейде ұйымдастырылғанын атап өтті. Сонымен қатар Мемлекет басшысы әлемдік экономикада көшбасшылардың бірі саналатын Үндістанның ғылыми-техникалық саладағы тамаша жетістіктеріне және халықаралық аренадағы зор беделіне тоқталды.
— Үндістан Сіздің парасатты әрі тегеурінді басшылығыңызбен прогресс пен орнықты даму жолында алға қарай нық қадам басып келеді, — деді Президент.
Мемлекет басшысы қазақ-үнді қарым-қатынасы көптеген бағытта қарқынды ілгерілеп келе жатқанын атап өтті.
— Бүгінде Қазақстанда үнді капиталының үлесі бар 600-дей компания нәтижелі жұмыс істейді. Былтыр елімізге 150 мыңға жуық Үндістан азаматы келді. Қазақстанда көптеген үнді студенттері білім алып жүр. Сондай-ақ біз халықаралық ұйымдар аясында тығыз ықпалдастық орнаттық, — деді Қасым-Жомарт Тоқаев.
