Мектепте енді шаш пен тырнаққа дейін тексере ме? Министр талапты түсіндірді

Фото: видеодан скрин

Қазақстан мектептерінде оқушылардың сыртқы келбетіне қойылатын талап қайтадан қызу талқыға түсті. Оқу-ағарту министрі Жұлдыз Сүлейменованың айтуынша, әр мектеп өзінің жарғысы мен ішкі тәртіп ережесіне сәйкес оқушының сыртқы келбетіне қатысты талаптарды нақтылай алады.

Яғни мектептер шаш үлгісі, киім және жалпы ұқыпты сыртқы келбетке қатысты өз тәртібін белгілей алады, алайда мұндай талаптар баланы кемсітуге немесе алалауға негіз болмауы тиіс. Министр оқушының сыртқы келбеті оқу процесіне кедергі келтірмеуі керектігін және бірыңғай мектеп формасы сақталуға тиіс екенін айтты. Дегенмен Қазақстанның барлық мектебінде шаш бояуға, макияж жасауға немесе маникюрге жаппай тыйым салатын жаңа талап енгізілген жоқ — мұндай мәселелер мектептің ішкі тәртібі аясында реттелуі мүмкін. Сондықтан жаңа оқу жылында ата-аналарға баласы оқитын мектептің ішкі ережелерімен алдын ала танысқан жөн.