Қазақстан соккадан ӘЧ-2026 ширек финалына шықты

Фото: Sports.kz

Германияның Эссен қаласында өтіп жатқан соккадан 2026 жылғы әлем чемпионатында Қазақстан құрамасы тарихи жетістікке жетті. 1/8 финалда Венгриямен кездескен қазақстандықтар пенальти сериясында басым түсіп, ширек финалға жолдама алды.

Бұл туралы Qazaqtoday.info сайты хабарлайды.

Матчтың негізгі уақыты 1:1 есебімен тең аяқталды. Қазақстан сапынан жалғыз голды Диас Үсенов соқты. Пенальти сериясында қазақстандық футболшылар мүмкіндіктерін сәтті пайдаланып, 2:0 есебімен жеңіске жетті.

Бұған дейін Қазақстан құрамасы топтық кезеңде үш кездесуде де ірі есеппен жеңіске жеткен еді. Ирак құрамасы 13:1, Түркия 8:1, ал Бельгия 5:1 есебімен тізе бүктірілді. Осы нәтижелердің арқасында Қазақстан турнирдің ең нәтижелі командаларының біріне айналды.

Қазақстанның ширек финалдағы қарсыласы 1/8 финалдың қалған ойындары аяқталғаннан кейін белгілі болады. Айта кетейік, Socca World Cup 2026 турнирі Германияның Эссен қаласында 28 тамыз бен 6 қыркүйек аралығында өтіп жатыр. Әлем чемпионатына 48 құрама қатысуда.