Ұлттық қордан бөлінетін 5 трлн теңге инфляцияны өршітпейді — Сүлейменов
Қаржы вице-премьері Тимур Сүлейменов Ұлттық қордан бөлінетін 5 трлн теңге инфляцияға айтарлықтай әсер етпейтінін мәлімдеді. Қаражат 2027-2029 жылдарға жоспарланған.
Видеодан кадр
Қаржы вице-премьері Тимур Сүлейменовтің мәлімдеуінше, Ұлттық қордан инфрақұрылымдық жобаларға бөлінетін 5 трлн теңге елдегі инфляциялық үдерістерге айтарлықтай әсер етпейді. Бұл қаражат үш жылға есептелген: 2027 жылы 2 трлн теңге, ал 2028 және 2029 жылдары тиісінше 1,5 трлн теңгеден жұмсалмақ.
Бұл туралы Qazaqtoday.info сайты хабарлайды.
Сүлейменов атап өткендей, аталған сома сырттай үлкен көрінгенімен, ел экономикасының болжамды көлемі 200 трлн теңгеден асатынын ескерсек, бұл көрсеткіш салыстырмалы түрде үлкен емес. Сондықтан оның пікірінше, бұл қаражаттың инфляцияға мега-әсері болмайды.
«Біз бұл қаражатты есептеулерімізге енгізіп, моделімізге қостық. Бүгінгі және кейінгі шешімдер де осыны ескеретін болады», — деді Тимур Сүлейменов.
