Түркістан облысында жолаушылар пойызының вагоны рельстен шығып кетті
Түркістан облысында №8 «Саратов – Алматы» пойызының вагоны рельстен шығып, зардап шеккендер бар. Оқиға себебі анықталып жатыр.
Фото: Politico.kz
Түркістан облысындағы Жаңақорған – Түркістан теміржол учаскесінде №8 «Саратов – Алматы» жолаушылар пойызының бір вагоны рельстен шығып кетті. Бұл оқиға салдарынан зардап шеккендер бар.
Бұл туралы Qazaqtoday.info сайты хабарлайды.
Оқиға кезінде вагонда 36 жолаушы болған, оның ішінде 13-і балалар. Алдын ала мәліметтерге сүйенсек, вагон рельстен шыққан сәтте дәретханада болған әйел басынан жарақат алған. Сонымен қатар, көрші вагондағы баланың үстіне қайнаған су төгіліп, ол күйік алған.
«Жолаушылар тасымалы» акционерлік қоғамының хабарлауынша, оқиғаға техникалық ақау себеп болуы мүмкін. Қазіргі уақытта көлік полициясы қылмыстық іс қозғап, оқиғаның нақты мән-жайы мен себебін анықтап жатыр.
Жолаушыларды межелі жерлеріне жеткізу үшін қосымша пойыз ұйымдастырылған. Оқиға орнына қалпына келтіру пойызы да жіберілді. Қазір тиісті мамандар оқиға салдарын жою және теміржол қозғалысын қалыпқа келтіру жұмыстарын жүргізіп жатыр.
