Әлемдегі миллиардерлер саны рекордтық деңгейге жетті
Altrata зерттеуі: әлемдегі миллиардерлер саны 3795-ке жетіп, рекордтық көрсеткішке ие болды. Олардың жиынтық байлығы 15,1 триллион долларды құрады.
Фото: AI көмегімен жасалған
Әлемнің ең бай адамдарының қатары жыл сайын артып келеді. Altrata аналитикалық компаниясының жаңа зерттеуіне сәйкес, қазіргі уақытта жер шарында 3795 миллиардер тіркелген. Бұл өткен жылмен салыстырғанда 287 адамға көп, яғни өсім 8,2 пайызды құрап отыр. Сарапшылар бұл көрсеткіш соңғы бес жылдағы ең жоғары қарқын екенін атап өтеді.
Миллиардерлердің жиынтық байлығы да айтарлықтай өскен. Олардың қаржысы бір жыл ішінде 12,8 пайызға артып, рекордтық 15,1 триллион АҚШ долларына жеткен. Орта есеппен бір миллиардердің байлығы 4 миллиард долларды құраса, медианалық көрсеткіш 2 миллиард доллар деңгейінде бағалануда.
Altrata сарапшыларының пікірінше, дәулетті адамдар қатарының өсуіне жасанды интеллект саласына салынған инвестициялардың қарқынды дамуы себеп болған. Сонымен қатар, зерттеу нәтижелері Ресей Федерациясының миллиардерлер саны бойынша әлемде төртінші орынға көтерілгенін көрсетеді. Көрші елде бұл көрсеткіш 151 адамға жеткен.
Ресейлік байлардың дәулетінің өсуіне валюта бағамы мен пайыздық мөлшерлемелердің өзгеруі, сондай-ақ сауданың Азияға қайта бағдарлануы аясында мұнайдан басқа шикізат тауарлары экспортынан түскен кірістердің артуы ықпал еткен. Ал миллиардерлер саны бойынша алғашқы үш орынды АҚШ, Қытай және Германия иеленіп отыр. 2025 жылы АҚШ-та 1265, Қытайда 363, Германияда 221 миллиардер болған.
Бұл деректер әлемдік экономикадағы байлық шоғырлануының жаңа белесін көрсетеді. Altrata компаниясының зерттеуі миллиардерлердің саны мен байлығының өсу динамикасын жіті бақылап, олардың әлемдік экономикаға әсерін талдауды жалғастыруда.
