Алматыда «Roland-Garros Junior Series» іріктеу турнирі аяқталды

Сурет: toppress.kz

Алматыда 16 жасқа дейінгі теннисшілер арасындағы «Roland-Garros Junior Series by Renault – Qualifications West and Central Asia» халықаралық турнирі мәресіне жетті. Жарыс 17-22 тамыз аралығында «Gorky Tennis Park» корттарында өтіп, Орталық және Батыс Азия елдерінің үздік жас спортшыларын біріктірді, деп хабарлайды Qazaqtoday.info сайты.

Турнир қорытындысы бойынша ұлдар мен қыздар арасындағы жарыста жеңімпаздар мен жүлдегерлер анықталды.

Ұлдар арасында бірінші орынды Иран өкілі Киараш Садегизейди иеленді. Күміс жүлдені қазақстандық теннисші Родион Трайгель алды, ал үшінші орынды тағы бір қазақстандық Бексұлтан Бауыржанға бұйырды. Тағы бір отандасымыз Әмір Асқар жарысты төртінші сатыда аяқтады. Осылайша, ұлдар арасындағы турнирдің үздік төрттігіне Қазақстанның үш өкілі енді.

Қыздар арасында Өзбекстаннан келген Александра Бармичева жеңіске жетті. Екінші орынды қазақстандық Алуа Марат иеленсе, қола жүлдені тағы бір қазақстандық теннисші Айым Қанағатова алды. Төртінші орынды да Қазақстан атынан сынға түскен Тамина Сәкен қорытындылады.

Іріктеу кезеңінің жеңімпаздары қазан айында Жапонияда өтетін «Roland-Garros Junior Series by Renault» финалында Батыс және Орталық Азия аймағын таныстыру құқығына ие болды.

Алматыдағы турнир аймақтағы жасөспірімдер теннисін дамытуға арналған халықаралық алаңдардың біріне айналды. Қазақстандық спортшылар жоғары нәтиже көрсетті: екі санатта да елдің үш өкілі үздік төрттікке енді.

«Roland-Garros Junior Series by Renault – Qualifications West and Central Asia» Қазақстан теннис федерациясы, Азия теннис федерациясы (АТФ) және Алматы қаласы әкімдігінің қолдауымен өтті. Жарысқа 16 жасқа дейінгі 16 ұл және 16 қыз қатысты.