Астанада такси жүргізушісінен сүйіс талап еткен жолаушы 10 тәулікке қамалды

Сурет: newtimes.kz

Астанада такси жүргізуші әйелден сүйіс талап етіп, қоқан-лоққы жасаған жолаушы 10 тәулікке қамауға алынды. Бұл оқиға елордадағы бір мекеменің маңында болған. Жол жүру аяқталған соң жолаушы көліктен шығудан бас тартып, әйел-жүргізушіге бағытталған балағат сөздер айтып, оны қорқытқан. Ол осылайша айналасындағыларға ашық құрметсіздік танытып, қоғамдық тәртіпті бұзған.

Бұл дерек полиция басқармасында тіркелгеннен кейін, жанжалдың видеосы Instagram әлеуметтік желісінде тарап кеткен. Сот отырысында құқық бұзушы кінәсін толық мойындаған.

Сот баспасөз қызметінің мәліметінше, әкімшілік жаза тағайындау кезінде сот құқық бұзушылықтың қоғамдық қауіптілігінің сипаты мен дәрежесін ескерген. Бұл әрекет қасақана жасалып, қоғамдық тәртіпті бұзуға, айналасындағыларға құрметсіздік көрсетуге және азаматтардың тыныштығын бұзуға бағытталған.

Сот қаулысымен астаналық тұрғын ҚР Әкімшілік құқық бұзушылық туралы кодексінің «Ұсақ бұзақылық» бабының 1-бөлігі бойынша кінәлі деп танылып, оған 10 тәулікке қамау жазасы тағайындалды. Сот қаулысы әлі заңды күшіне енген жоқ.

Еске салайық, зардап шеккен әйел болған жанжалдың мән-жайын айтып берген. Оның сөзінше, жолаушы оның әріптесі болып шыққан. Ол көлікке бес адамнан тұратын компаниямен бірге отырған. Тапсырыс аяқталған соң ер адам салоннан шығудан бас тартып, оны сүйуді және өзімен бірге мекемеге баруды талап еткен. Жүргізуші бас тартқан соң, жолаушы балағаттап, көліктің қозғалуына кедергі келтіріп, видеорегистраторды жұлып алуға тырысып, физикалық зорлық көрсетемін және көлікті өртеп жіберемін деп қорқытқан. Осыған байланысты әйел полицияға жүгінуге мәжбүр болған.