Қазақстан Президенті Қасым-Жомарт Тоқаев «Болашақ ойындары – 2026» ашылу салтанатында сөз сөйледі
Қазақстан Президенті Қасым-Жомарт Тоқаев «Болашақ ойындары – 2026» халықаралық сайысының ашылу салтанатында сөз сөйлеп, шараның маңыздылығын атап, Ресей, Тәжікстан, Өзбекстан және Қырғызстан басшыларына алғыс білдірді.
Қазақстан Президенті Қасым-Жомарт Тоқаев «Болашақ ойындары – 2026» халықаралық сайысының ашылу салтанатында сөз сөйледі, деп хабарлайды Qazaqtoday.info сайты.
Президент өз сөзінде: «Ең алдымен, бәріңізге елордамыз – Астанаға шын жүрегіммен қош келдіңіздер деймін! Бүгін біз «Болашақ ойындары – 2026» халықаралық сайысын бастаймыз. Бұл – елдеріміз арасындағы достық қарым-қатынасты нығайтатын мағынасы айрықша тарихи іс-шара. Дүбірлі дода биыл Қазақстанда алғаш рет өтіп жатыр. Біз үшін бұл – зор мәртебе», — деді.
Тоқаевтың айтуынша, Ресей Президенті Владимир Путин Қазақстанға және барлық спортшыларға арнайы құттықтауын жолдаған. Ол бұл ыстық ықылас үшін Ресей көшбасшысына алғысын білдірді. Сондай-ақ, салтанатты рәсімге Тәжікстан Президенті Эмомали Шарипович Рахмон, Өзбекстан Президенті Шавкат Миромонович Мирзиёев және Қырғызстан Президенті Садыр Нургожоевич Жапаров қатысқанын атап өтті. Ол бауырлас елдердің басшылары мен ресми делегация жетекшілеріне ризашылығын жеткізді.
«Болашақ ойындары» Ресейдің бастамасымен жүзеге асқан жоба екенін айтқан Президент, бұл жобаның сәтті іске асуына Президент Владимир Путиннің үлесі зор екенін атап өтті. «Аз уақыт ішінде бұл жарыс жаһандық деңгейдегі сайысқа айналды. Бірінші дода Қазан қаласында өтіп, содан кейін Әбу-Дабиде жалғасын тапты», — деді Қасым-Жомарт Тоқаев.
