Орал орман шаруашылығындағы өртті сөндіру жалғасуда
Орал орман шаруашылығында шыққан өртті сөндіруге 80-ге жуық адам, 10 техника және 2 тікұшақ жұмылдырылды. Авиация 68 тонна су шашты.
Сурет: ulysmedia.kz
Орал орман шаруашылығы аумағында өрт шықты. Бұл туралы ҚР экология және табиғи ресурстар министрлігіне қарасты мекеме хабарлады. Өртті сөндіруге ТЖМ, ЭТРМ орман шаруашылығы комитетінің күштері мен құралдары, сондай-ақ жергілікті атқарушы органдар жұмылдырылды. Әуеден ТЖМ-нің «Қазавиақұтқару» АҚ және «Қазавиаорманқорғау» РМҚК тікұшақтары тартылды, деп хабарлайды Qazaqtoday.info сайты.
ТЖМ мәліметінше, өртті сөндіруге желдің екпінділігі кедергі келтіруде. Осыған қарамастан, бөлімшелер өртті оқшаулау және жою жұмыстарын жалғастыруда. Барлығы өртті жоюға 80-ге жуық адам, 10 бірлік жерүсті техникасы және 2 тікұшақ жұмылдырылды. Авиация 46 рет су шашып, жалпы көлемі 68 тонна су жұмсады. Өртті жою жұмыстары әлі де жалғасуда.
Бұған дейін бір тәулік ішінде Қазақстанның мемлекеттік орман қоры жерінде үш орман өрті тіркелген болатын.
