Абай облысындағы өрт: полиция балалар лагерінен 190 баланы эвакуациялады

Фото: Абай облысы ПД

Абай облысында болған табиғи өрт кезінде полиция қызметкерлері өрт қаупі төнген «DosbolLike» балалар лагерінен 190 бала мен 20 қызметкерді қауіпсіз жерге көшірді, деп хабарлайды Qazaqtoday.info ақпарат порталы.

Абай облысы Полиция департаментінің мәліметінше, өрт туралы хабар түскен сәттен бастап тәртіп сақшылары оқиға орнына жедел жетіп, эвакуациялау жұмыстарын бастаған.

Полицейлер балаларды дүрбелеңге жол бермей, ұйымдасқан түрде лагерь аумағынан шығарған. Ал ең кішкентай бүлдіршіндерді қолдарына көтеріп, жұбатып, қауіпсіз жерге жеткізген.

Қазіргі уақытта полиция күшейтілген режимде жұмысын жалғастырып жатыр. Қауіпті аумақ қоршауға алынып, өрт ошағына апаратын жолдар уақытша жабылған. Сонымен қатар өрт сөндіру және арнайы техникалардың кедергісіз қозғалысы қамтамасыз етілуде.

Ведомствоның мәліметінше, тәртіп сақшылары төтенше қызметтердің колоннасын бастап жүріп, жол қозғалысын реттеп, қоғамдық тәртіпті қамтамасыз етіп, эвакуацияланған тұрғындардың мүлкін күзетіп жатыр.

Бұл жұмыстар Төтенше жағдайлар министрлігі, Экология және табиғи ресурстар министрлігі, Қорғаныс министрлігі және өзге де қызметтердің қатысуымен тәулік бойы жүргізілуде.

Бұдан бөлек, өрт қаупіне байланысты Камышенка ауылындағы 20 үйден барлығы 49 тұрғын эвакуацияланған.