Шымкентте автокөлік жөндеу бокстары өртенді
Фото: ҚР ТЖМ бейнежазбасынан скриншот
Шымкент қаласының Тұран ауданындағы Исаханов көшесінде орналасқан автокөлік жөндеу бокстарында өрт шықты.
Төтенше жағдайлар министрлігінің мәліметінше, оқиға орнына жеткен өрт сөндірушілер сегіз бокстың төртеуін қызыл жалын шарпығанын анықтады.
Өрттің жалпы аумағы 119 шаршы метрді құрады. Өртті сөндіру барысында құтқарушылар қауіпті аймақтан көлемі 50 литрлік оттегі баллонын қауіпсіз жерге шығарып, жарылыс қаупінің алдын алды.
Өрт толықтай сөндірілді. Зардап шеккендер жоқ. Қазіргі уақытта өрттің шығу себебі анықталып жатыр.
