Жезқазғанда апатты үйдің төбесінен су сорғалап, шенеуніктер тұрғынды «кезегін күтуге» мәжбүрлеуде
Фото: Видеодан скрин
Жезқазғанда маусымның ортасынан бері жауған әр жаңбыр жоғарғы қабатта тұратын зейнеткерді тығырыққа тіреп, үйін осымен 8 рет су басты, деп хабарлайды Qazaqtoday.info сайты.
Үй қабырғалары көгеріп, сыздан тұрғынның аллергиясы қозып кеткен, алайда жергілікті ПИК (КСК) 25 жыл ішінде бірде-бір рет шатырды жөндемегенін айтып, жауапкершіліктен қашып отыр. Көршілерінің көбі зейнеткерлер болғандықтан, қымбат жөндеу жұмыстарына өз бетінше ақша жинау мүмкін емес. Буыны сырқырап, ауру меңдеген әйел төбеден аққан суды еденде еңбектеп жүріп, шүберекпен жинауға мәжбүр.
Ал Жезқазған қаласының әкімдігі «алдағы 2-3 айға кезек толып тұр» деген сылтаумен, апатты жағдайда өмір сүріп жатқан азаматты қабылдаудан бас тартқан. Өңірдегі жауапты шенеуніктердің мұндай селқостығы мен тасбауырлығы халықтың мұң-мұқтажына бас қатырғысы келмейтін жүйенің нақты сипатын көрсетіп отыр.
