Балқаш па, әлде Венеция ма? Қала көшесін жаңбырдан кейін су басады
Фото: Видеодан скрин
Балқаш қаласында жауын жауса болды, Желтоқсан көшесіндегі 12-үйдің маңы кәдімгі көлге айналып, инфрақұрылымның сорақы күйін паш етеді, деп хабарлайды Qazaqtoday.info сайты.
Су деңгейі жиектасқа дейін көтеріліп, ортасында қалған көліктердің қозғалтқышы өшіп, жаяу жүргіншілердің жолы мүлдем кесілді. Тұрғындар бұл созылмалы масқараға нөсер арықтарының мүлдем жоқтығы немесе қоқысқа толып, уақытылы тазаланбауы себеп деп ашынады. Әр жауын сайын асфальт шайылып, мемлекет қаржысы суға ағып жатса да, Балқаш қаласының әкімдігі бұл мәселеге бас ауыртып, селт етер емес.
Халықтың қауіпсіздігі мен жайлылығын артқы шегіндірген жергілікті билік коммуналдық апаттың алдын алуға әлі күнге дейін қауқарсыздық танытып отыр. Жауапты шенеуніктер шұғыл түрде су бұру жүйесін ретке келтірмесе, Желтоқсан көшесіндегі бұл «жасанды теңіз» тұрғындарды әлі талай әбігерге салары анық.
