Қасым-Жомарт Тоқаев Таиланд Премьер-министрінің орынбасарымен кездесті

Мемлекет басшысы Таиланд Премьер-министрінің орынбасары – Сыртқы істер министрі Сихасак Пуангкеткеомен кездесіп, екіжақты ынтымақтастықты дамыту мәселелерін талқылады, деп хабарлайды Qazaqtoday.info сайты.

Қасым-Жомарт Тоқаев мәртебелі мейманға ілтипат білдіріп, оның сапары Қазақстан мен Таиланд арасындағы қарым-қатынасқа жаңа серпін беретінін атап өтті. «Сіздің еліңіз Оңтүстік-Шығыс Азиядағы жетекші экономикалардың бірі, Жаһандық Оңтүстіктің маңызды өкілі әрі халықаралық қоғамдастықтың беделді мүшесі саналады. Қазақстан Таиландпен өзара тиімді ынтымақтастықты тереңдетуге мүдделі. Келесі жылы елдеріміз арасында дипломатиялық қатынас орнағанына 36 жыл толуын атап өтеміз», – деді Президент.

Мемлекет басшысы екіжақты сауда-экономикалық байланыстардың қарқыны артып келе жатқанын айтты. Бұған визасыз режим, туристер ағынының өсуі және іскерлік байланыстардың кеңеюі ықпал етуде. «Қазақстан – Таиландтың Орталық Азиядағы ең ірі сауда серіктесі. Өңірмен жалпы тауар айналымының 70 пайызы біздің елімізге тиесілі. Әйтсе де әлеуетіміз әлі жеткілікті деп санаймыз. Қазіргі кезде Қазақстан нарығында 55 таиландтық компания тіркелген. Сізбен бірге елімізге үлкен бизнес-делегация келген екен. Қазақстан іскерлік байланыстардың нығаюын құптайды әрі Таиланд компанияларын еліміздегі инвестициялық мүмкіндіктерді қарастыруға шақырады», – деді Президент.