Астанада автобуста қызға әдепсіз әрекет жасаған ер адам 10 тәулікке қамалды
Астанада автобуста қызға әдепсіз әрекет жасаған 46 жастағы ер адам ұсталып, сот шешімімен 10 тәулікке әкімшілік қамаққа алынды.
Сурет: Видеодан скриншот
Астанада қоғамдық көлікте жас қызға қатысты әдепсіз әрекет жасаған ер адам ұсталып, әкімшілік жазаға тартылды. Бұл туралы полиция қызметкерлері әлеуметтік желілерге жүргізген мониторинг барысында белгілі болды.
Бұл туралы Qazaqtoday.info сайты хабарлайды.
«Әлеуметтік желілерге жүргізілген мониторинг барысында полиция қызметкерлері қоғамдық көлікте ер адамның әдепсіз әрекеттеріне тап болғаны туралы қыздың жарияланымын анықтады», — деп хабарлады полиция.
Жедел іс-шаралар нәтижесінде 46 жастағы ер адам анықталып, ұсталды. Оған қатысты әкімшілік іс қозғалды. Сот шешімімен ол 10 тәулік мерзімге әкімшілік қамаққа алу жазасына тартылды.
Полиция азаматтарға қатысты кез келген әдепсіз әрекет пен құқыққа қайшы мінез-құлыққа жол берілмейтінін және мұндай әрекеттер үшін заңда белгіленген жауапкершілік көзделгенін ескертеді.
