Маңғыстау облысында қант диабетіне шалдыққан тұрғындар саны көбейді
Фото: Depositphotos.com
Маңғыстау облысында жыл басынан бері қант диабетімен сырқаттану көрсеткіші өскен. 2025 жылдың осы кезеңімен салыстырғанда науқастар саны 40 адамға артқан. Бұл туралы Qazaqtoday.info агенттігі Lada.kz-ке сілтеме жасап хабарлайды.
Маңғыстау облыстық санитариялық-эпидемиологиялық бақылау департаменті басшысының орынбасары Баян Сатқанбаеваның айтуынша, балалар арасындағы қант диабеті бойынша жағдай тұрақты деңгейде сақталып отыр.
«Осы жылдың алғашқы тоқсанында Маңғыстау облысында қант диабетінің 503 жағдайы тіркелді. Оның ішінде сегізі балалар арасында анықталды. Жасөспірімдер арасында жаңа жағдайлар тіркелген жоқ. Ал 2025 жылдың осы кезеңінде 463 жағдай тіркелген болатын, оның сегізі балаларға, үшеуі жасөспірімдерге тиесілі еді. Осылайша, өңірде балалар арасындағы қант диабетімен сырқаттану деңгейі тұрақты күйінде қалып отыр», – деді Баян Сатқанбаева.
