Қасым-Жомарт Тоқаев Өзбекстан Президенті Әкімшілігінің Басшысы Саида Мирзиёеваны қабылдады
Қасым-Жомарт Тоқаев Өзбекстан Президенті Әкімшілігінің Басшысы Саида Мирзиёеваны қабылдады. Тараптар стратегиялық серіктестік пен цифрландыру мәселелерін талқылады.
Мемлекет басшысы Қасым-Жомарт Тоқаев Өзбекстан Президенті Әкімшілігінің Басшысы Саида Мирзиёеваны қабылдады, деп хабарлайды Qazaqtoday.info сайты.
Кездесу барысында Қасым-Жомарт Тоқаев Саида Мирзиёеваның сапары Астана мен Ташкенттің стратегиялық серіктестігін ілгерілету тұрғысынан ерекше мәнге ие екенін атап өтті. Президент әкімшіліктер арасындағы жұмыс қатынастарының жандануы Орталық Азиядағы тұрақтылық пен өңірлік ықпалдастықты нығайтуға ықпал ететінін айтты. Сондай-ақ, Қазақстан мен Өзбекстан дамудың бетбұрыс кезеңінде тұрғанын, реформаларды сәтті іске асыру үшін бейбітшілік пен қауіпсіздік қажет екенін жеткізді.
Мемлекет басшысы 2026 жыл Қазақстанда Цифрландыру және жасанды интеллект жылы деп жарияланғанына тоқталып, Өзбекстанның осы саладағы жетістіктерімен танысқанын еске алды. Қасым-Жомарт Тоқаев әлем жасанды интеллектіні дамытуға бет бұрғанын, сондықтан Қазақстан да заман ағымына ілесуі керек екенін айтты. Соңында ол Өзбекстан Президенті Шавкат Мирзиёевке жылы лебізін жолдады.
