LOT Polish Airlines Алматыдан Варшаваға тікелей әуе рейсін іске қосады
Польшаның LOT Polish Airlines әуе компаниясы 2026 жылдың 31 мамырынан бастап Алматы-Варшава бағытында тікелей рейс ашады. Жаңа бағыт туризмді дамытуға ықпал етеді.
2026 жылдың 31 мамырынан бастап Польшаның ұлттық әуе тасымалдаушысы LOT Polish Airlines Алматы мен Варшава арасында тікелей әуе рейсін іске қосады. Қазақстанның ірі мегаполисінен Еуропа орталығына қатынайтын жаңа бағыт аптасына төрт рет орындалады деп жоспарланған, деп хабарлайды Qazaqtoday.info сайты.
Әуе қатынасы заманауи Boeing 737 MAX ұшақтарымен жүзеге асырылады. Бұл жаңа рейс Қазақстан мен Еуропа арасындағы байланысты едәуір жақсартып, жолаушылар үшін сапарды барынша жайлы әрі ыңғайлы етеді.
Жаңа бағыттың ашылуына орай 1 маусымда Алматыға польшалық туроператорлар мен тревел-блогерлерден құралған арнайы делегация келеді. Олар үшін қаланың туристік әлеуетімен таныстыру мақсатында мазмұнды бағдарлама әзірленген. Сапар барысында қонақтар жергілікті туроператорлармен және бизнес өкілдерімен кездесіп, ынтымақтастық орнату мүмкіндіктерін талқылайды.
Халықаралық әуе қатынасын кеңейту – Алматы қаласының экономикасы үшін басым бағыттардың бірі. Варшаваға ашылған жаңа рейс туристер ағынын арттырып, халықаралық іскерлік байланыстарды нығайтуға және қаланың Орталық Азиядағы маңызды туристік әрі іскерлік орталық ретіндегі мәртебесін бекітуге ықпал етеді.
