Владимир Путин Астанаға мемлекеттік сапармен келді
Ресей президенті Владимир Путин Қазақстанға мемлекеттік сапармен келді. Қасым-Жомарт Тоқаев мәртебелі мейманды елорда әуежайында өзі қарсы алды.
Сурет: inform.kz
Ресей Федерациясының Президенті Владимир Путин Мемлекет басшысы Қасым-Жомарт Тоқаевтың шақыруымен Қазақстанға мемлекеттік сапармен келді. Ресей басшысының сапары аясында екіжақты қарым-қатынастардың өзекті мәселелері талқыланады, деп хабарлайды Qazaqtoday.info сайты.
Елорда әуежайында мәртебелі мейманды Президент Қасым-Жомарт Тоқаевтың өзі қарсы алды. Владимир Путиннің құрметіне құрмет қарауылы сап түзеді. Сонымен қатар Ресей Президентінің ұшағы мемлекеттік шекараны кесіп өткен сәттен бастап оны Қазақстанның Әуе қорғанысы күштерінің жойғыш ұшақтары алып жүрді.
Ресей басшысымен бірге құрамында 30-дан астам адам, оның ішінде министрлер мен ірі компаниялардың басшылары бар ауқымды делегация келді. Қонақтар үшін салтанатты кездесу ұйымдастырылып, әуежайда қазақ және орыс халық әндері шырқалды. Сондай-ақ ұшу-қону жолағының үстінен Қазақстан мен Ресейдің туларын тікұшақтар алып ұшты.
Сапар барысында мемлекет басшылары Қазақстан мен Ресей арасындағы жан-жақты стратегиялық серіктестік пен одақтастық қатынастардың қазіргі жағдайы мен оны нығайту перспективаларын талқылайды деп күтілуде. Бұдан бөлек, 28 мамырда Еуразиялық экономикалық форум, ал 29 мамырда Жоғары Еуразиялық экономикалық кеңестің отырысы өтеді.
