Семейдің қақ ортасындағы жол жүруге келмейді

Фото: видеодан скрин
Семейдің қақ ортасындағы Би Боранбай көшесі, 45а үйінің тұрғындары бірнеше жылдан бері өз аулаларында батпақ кешіп өмір сүруге мәжбүр.

Баяғыда жылу трассасын жүргіземіз деп жерді астан-кестенін шығарып қазғандар, ісін бітірген соң «балалар алаңын салып береміз» деп уәдені үйіп-төккен.

Алайда, уәде үйіліп қалды, ал халықтың сиқы мынау: жауын жауса болды, аула бетімен кеткен көлшік пен батпаққа айналады. Бұл жермен көлік түгіл, бала жетектеп, арба итерген аналардың жаяу жүруі мүлдем мүмкін емес. Жер сәл кепсе, орынында соқпақ емес, оңбаған шұңқырлар мен үңірейген оймақтар қалады. Шыдамы таусылған семейліктер қалалық тұрғын үй-коммуналдық шаруашылық бөліміне ресми арыз да жазып көрді. Әкімдіктегілердің берген жауабы жалғыз-ақ сөз: «Күте тұрыңыздар». Сонда атқамінерлердің «ертеңіне» сенген жұрт тағы қанша жыл батпақ кешуі тиіс? Тозығы жеткен ауланың бұл жыры қашан аяқталары әзірге беймәлім.