Ресей президенті Владимир Путин ірі бизнесмендермен жабық кездесу өткізіп, оларға Украинамен соғысты қаржыландыру үшін бюджетке «ерікті жарна» салуды ұсынды, деп хабарлайды Qazaqtoday ақпарат агенттігі.
The Bell басылымының дереккөздеріне сәйкес, бұл ұсыныс Ресей өнеркәсіпшілері мен кәсіпкерлері одағының съезі аясында өткен бейресми жиында айтылған.
Басылымның сұхбаттастары Ресей президентінің сөзін «соғысамыз деді» және «Донбасс шекарасына дейін барамыз» деп сипаттаған.
Дереккөздердің айтуынша, бұл бастама «Роснефть» басшысы Игорь Сечинге тиесілі. Ол кездесу қарсаңында Путинге хат жолдап, «елге қиын-қыстау заманда бизнесті сілкілеп алу» идеясын ұсынған. Қаражат тарту тетігі ретінде әскери федералдық қарыз облигацияларын шығару жолы талқыланған.
The Bell басылымына екі дереккөз кәсіпкер Сүлейман Керимовтің бұл өтінішке бірден келісіп, бюджетке 100 миллиард рубль бөлуге уәде бергенін растады. Басылымның жазуынша, аты-жөні аталмаған тағы бір ірі кәсіпкер де Путиннің ұсынысын қолдаған.
Фото: Әлеуметтік желіден
