Алматыда көпшіліктің есінде қалған Сайран көліндегі итті құтқару оқиғасына арнап жаңа арт-нысан орнатылды. Адамгершілік пен бірліктің символына айналған мүсін Үлкен Алматы өзенінің арнасына қойылды, деп хабарлайды Qazaqtoday ақпарат агенттігі.
Жоба бастамашысы – «Progression CA» жарнама агенттігі. Компания бұл игі істі толығымен өз қаражатына жүзеге асырған, яғни оған бюджеттен ақша жұмсалған жоқ. Арт-нысан Қалалық қоғамдық кеңістіктерді дамыту басқармасымен келісілген және наурыз айының соңында ресми түрде ашылады.
Естеріңізге сала кетейік, Сайран көліндегі итті құтқару оқиғасы халықаралық деңгейде талқыланып, қоғамға мейірімділік пен жанашырлық сияқты маңызды құндылықтарды еске салған еді. Жаңа мүсін сол оқиғаның негізінде жасалған.
Композиция бір-біріне қол ұшын созған адамдардың бейнесі арқылы қиын сәттегі өзара көмек пен ынтымақтың маңызын көрсетеді. Ұйымдастырушылардың айтуынша, заманауи интерактивті форматта жасалған бұл туынды қала тұрғындары мен қонақтары жиі келетін жаңа орынға айналады деп күтілуде.
Жобаның негізгі мақсаты – қоғамдық кеңістіктерді көркейту және қала ортасында бірлік, өзара көмек сияқты құндылықтарды насихаттау.
Фото: Әлеуметтік желіден
