Қазақстанның Ішкі істер министрлігі болашақ жүргізушілерге үндеу жасап, онлайн-курстардың көлік басқару дағдысын қалыптастырмайтынын ескертті, деп хабарлайды Qazaqtoday ақпарат агенттігі.
Ведомствоның мәліметінше, соңғы кезде интернет пен әлеуметтік желілерде жүргізушілерді жедел даярлайтын онлайн-курстар туралы жарнама көбейген. Алайда министрлік мұндай оқытудың толыққанды автомектепті алмастыра алмайтынын қатаң ескертеді.
«Азаматтарға автомектепті бітіргені туралы қағаз куәлікті алудың қажеті жоқ. Курсты аяқтағаны туралы ақпарат мамандандырылған халыққа қызмет көрсету орталықтарына ақпараттық жүйелер арқылы электронды форматта автоматты түрде түседі», – делінген ресми хабарламада.
Осыған байланысты министрлік болашақ жүргізушілерді оқу үдерісіне жауапкершілікпен қарауға шақырады. Себебі жол қозғалысының барлық қатысушысының қауіпсіздігі алынған білім мен дағдының сапасына тікелей байланысты.
Фото: Әлеуметтік желіден
