«Бақұл бол, білікті дәрігер… »: Жаңаөзенде қаза тапқан жас маманға әріптестері жоқтау жазды

Жаңаөзен қаласында пышақ жарақатынан қаза тапқан 29 жастағы дәрігерге қатысты әріптестері жүрек тебірентерлік жазба жариялады деп хабарлайды Qazaq Today ақпарат порталы. 

Марқұм Жаңаөзен қалалық көпбейінді ауруханасында қызмет атқарған. Әріптестері оны білікті маман, жауапкершілігі жоғары дәрігер әрі адамгершілігі мол азамат ретінде еске алды.

«Орны толмас қаза. Әріптесіміз Аманғалиев Нұрдәулет Құрманғазыұлының отбасы мен жақындарына қайғыра көңіл айтамыз. Бақұл бол, білікті дәрігер, жаны жайсаң жолдас, қайсар азамат», – делінген аурухана ұжымы таратқан жазбада.

Еске сала кетейік, қайғылы оқиға Жаңаөзенде болған. Алдын ала мәлімет бойынша, екі ер адам арасындағы жанжал отбасылық-тұрмыстық себептерге байланысты туындаған. Жанжал барысында 29 жастағы дәрігерге пышақпен шабуыл жасалған.

Оқиғадан кейін күдікті құқық қорғау органдарына өз еркімен келіп, кінәсін мойындаған. Қазіргі таңда аталған дерек бойынша қылмыстық іс қозғалып, күдікті қамауға алынды. Тергеу амалдары жүргізіліп жатыр.