Оқу жылының ортасында күнделік ауысты: Министр әкімдіктерге жауапкершілік жүктеді

Оқу-ағарту министрі Жұлдыз Сүлейменова қазақстандық мектептерде оқу жылының ортасында электронды күнделікті ауыстыруға болмайтынын мәлімдеді, деп хабарлайды Qazaqtoday ақпарат агенттігі.

Мәселенің мәнісі, үшінші тоқсанның алғашқы күні, яғни 8 қаңтарда Алматы қаласының білім басқармасы қаладағы мектептердің Kundelik платформасынан BilimClass жүйесіне көшкенін хабарлаған. Министрдің айтуынша, ведомство қысқы демалыс кезінде әкімдіктерге оқу жылының соңына дейін LMS (оқытуды басқару жүйесі) жүйелерін ауыстырмау туралы ұсыныс жолдаған. Алайда, түпкілікті шешімді жергілікті атқарушы органдар өздері қабылдайды.

«Оқу жылының ішінде, оның ортасында мұндай қолайсыздықтар туындамауы керек. Егер қыркүйекте оқу процесі бір LMS-жүйемен басталса, әрине, оқу жылын сол жүйемен аяқтаған дұрыс болар еді. Бірақ бұл шешімді жергілікті атқарушы орган қабылдағанын және жауапкершілік те солардың мойнында екенін тағы да қайталап айтқым келеді», — деді Сүлейменова Үкіметте өткен брифингте.

Фото: Әлеуметтік желіден