Өскеменде қаңғыбас иттер көбейіп, тұрғындар алаңдаулы

Өскемен қаласында қаңғыбас иттер мәселесі өзекті күйінде қалып отыр. Тұрғын үйлердің ауласында, мектептердің маңында топтасып жүретін иттер күнделікті көрініске айналған. Әсіресе Карбышев көшесіндегі 44-үй аумағы мен №15 мектеп жанында жағдай тым ушығып тұр. Ата-аналар балаларын мектепке алаңдап шығарып салып, кешкі уақытта тұрғындар көшеге шығудан қауіптенетін болған, деп хабарлайды Qazaq Today ақпарат порталы.

Кейбір жағдайларда иттер көлікке және жаяу жүргіншілерге жақындап, адамдарға үрей туғызады. Қала халқының айтуынша, бұл бір күнде пайда болған мәселе емес – бірнеше жыл бойы жүйелі түрде шешілмей келе жатқан түйткіл.

Тұрғындар тиісті мекемелер нақты шара қабылдамай, жауапкершілікті бір-біріне ысырып отырғанын айтады. Қалалық биліктен қауіпсіздікті қамтамасыз етумен қатар жануарларға да адамгершілікпен қарауды ескере отырып, тиімді шешім қабылдау талап етілуде.