Батыстағы қантөгіс жол апаты: 8 адам бірден қаза тапты
Фото: БҚО ПД
Батыс Қазақстан облысында сұмдық жол апаты болды. Чапай — Жаңақала — Сайхин трассасында Toyota Camry мен Volkswagen Sharan бетпе-бет соқтығысты, деп хабарлайды Qazaq Today ақпарат порталы.
Алдын ала мәліметке қарағанда, жүргізушілердің бірі қарсы жолаққа шығып кеткен. Қатты соққыдан кейін көліктердің бірі өртеніп, сегіз адам оқиға орнында көз жұмды. Тағы төрт адам ауыр жағдайда ауруханаға жеткізілді.
Оқиға бойынша қылмыстық іс қозғалды.
«Оқиға орнында полиция, тергеу тобы және ТЖД мамандары жұмыс істеп жатыр», — деп хабарлады БҚО полиция департаменті.
Жыл басынан бері Қазақстанда 29 мыңнан астам жол апаты тіркелген. Қарсы жолаққа шығу — әлі күнге дейін ең көп адам өлімін әкелетін себептердің бірі.
