«Қайрат» пен «Реал» матчына кіре алмаған шетелдік бала ерекше сыйлыққа ие болды
Фото: Видеодан алынған кадр
Мұны оған өз елінің кәсіпкерлері табыс еткен.
Өзбекстаннан Алматыға тарихи матчты көру үшін келген әке мен баланың оқиғасы әлеуметтік желіде кеңінен тараған еді, деп хабарлайды Qazaq Today ақпарат порталы.
Олар Viagogo сайтынан 1175 долларға (630 998 теңге) билет сатып алған. Өкініштісі сол, стадионға келгенде ғана билеттердің жалған екенін анықтаған.
Осылайша, «Қайрат» пен «Реал Мадрид» арасындағы матчқа кіре алмаған өзбекстандық бала әйгілі «Реал Мадрид» пен «Челси» клубының аңызы Клод Макелеленің қолтаңбасы бар допты сыйлыққа алды.
Кейіннен қазақстандық танымал медиа жобаның негізін қалаушы Марғұлан Тұрсынов аталған отбасын тауып, қаржылай көмек ұсынған болатын.
– Бізге жәрдем керек емес. Тек мерекенің бір бөлігі болғымыз келген, – деп қысқа қайырды оған өзбек жанкүйердің отбасы.
Соңында Viagogo сайты да ақшаны қайтарып берді. Ал бала Арминнің арманы – «Реал Мадрид» клубын Испанияда көру. Бұйырса, мұны да өзбек кәсіпкерлері орындауы мүмкін.
