«Мені кешіріңіздер – маған Мәскеуге оралу қажет»: Ресей премьері Қырғызстаннан ерте кетіп қалды

Ресей үкіметінің басшысы Михаил Мишустин Қырғызстанның Чолпон-Ата қаласында өтіп жатқан Еуразиялық үкіметаралық кеңестің отырысынан мерзімінен бұрын кетіп қалды. Бұл шешімін ол АҚШ пен Ресей саммитіне байланысты түсіндірді, деп жазады РИА Новости.

«Мені кешіріңіздер – маған Мәскеуге оралу қажет. Бүгін Аляскада Ресей мен АҚШ президенттерінің саммиті өтеді. Владимир Владимирович Путин мен Дональд Трамп қатысатын бұл кездесуде Ресейде болуым керек», – деді Мишустин.

Аляскадағы бұл саммит – Ресейдің Украинаға толыққанды басып кіруінен кейінгі екі ел басшылары арасындағы алғашқы кездесу. Ол Анкоридж қаласындағы АҚШ ӘӘК Элмендорф-Ричардсон әскери базасында өтеді.

Сонымен қатар, Қазақстан премьер-министрі Олжас Бектенов Чолпон-Атада өткен Еуразиялық үкіметаралық кеңестің тар форматтағы отырысына қатысты. Жиынға Беларусь премьер-министрі Александр Турчин, Қырғызстан министрлер кабинеті төрағасы – президент әкімшілігінің жетекшісі Адылбек Қасымалиев және Армения вице-премьері Мгер Григорян да қатысқан.

Кеңес барысында биыл 31 қаңтарда Алматыда өткен Еуразиялық үкіметаралық кеңестің тапсырмаларының орындалу барысы талқыланды. Сондай-ақ, кедендік және салықтық әкімшілендіруді цифрландыру, заманауи технологияларды пайдалана отырып ақпарат алмасуды жетілдіру мәселелеріне баса назар аударылды.