Юлия Путинцева әлемдік рейтингте жеке рекордын жаңартты

Ал Елена Рыбакина бір саты төмен сырғыды.

Әйелдер теннисі қауымдастығының (WTA) жаңартылған рейтінгісінде қазақстандық теннисші Юлия Путинцева 23-орынға көтерілді, деп хабарлайды Qazaq Today ақпарат порталы.

Бір апта бұрын ол 29-дан 25-ке жоғарылап, өзінің спорттық жолындағы үздік көрсеткішіне қол жеткізген еді.

Аделаидада финалға дейін жеткен америкалық Джессика Пегула қазақстандық Елена Рыбакинаны ығыстырып, алтыншы орынға тұрақтады.

Жұптық сында Қазақстанның үздігі Анна Данилина 23-тен қайтадан 22-ге көтерілсе, Ю.Путинцева 111-ден 108-ге ауысты. Жібек Құламбаева бұрынғыша 156-да тұр.

Айта кетейік, Е.Рыбакина, Ю.Путинцева және А.Данилина Мельбурнда өтіп жатқан Аустралия ашық чемпионатында сәтті өнер көрсетсе, әлемдік рейтингідегі жағдайларын жақсарта алады.