Павлодарда қарақшылар банктің қабырғасын бұзып кірген
Павлодар облысының полиция департаменті белгісіз адамдардың банк қабырғасын бұзып кіргенін мәлімдеді, деп хабарлайды Qazaq.today.
«11 қарашада сағат 09:30-да полицияға банктің бір филиалында қабырғаның бұзылғаны туралы хабарлама түсті», – делінген полиция мәліметінде.
Оқиға орнында тергеу-оперативтік тобы жұмыс істеп, мән-жай мен себептерді анықтап жатыр. Сотқа дейінгі тергеу басталды. Полиция қызметкерлері бұл оқиғаға қатысы бар адамдарды анықтау бойынша жедел-іздестіру іс-шараларын жүргізіп жатыр. Сондай-ақ бұл жағдайға банк өкілдері де түсінік берді.
«11 қарашада таңертең банкке сағат 22:00-ден 23:00-ге қараған түні белгісіз адамдардың Павлодардағы Halyk бөлімшесіне (Естай көшесі, 40 мекенжайы бойынша) кіргені туралы хабар түсті. Оқиға орнында жедел-тергеу тобы жұмыс істеп жатыр. Halyk филиалының қызметкерлері істің мән-жайын анықтауға бағытталған тергеу жұмыстарына қолдау көрсетті», – деп мәлімдеді банк өкілдері.
Осы орайда банктің баспасөз қызметі көпшіліктен жалған ақпараттың таралуына жол бермеуді сұрады. Өйткені жалған мәлімет полицияның тергеу жүргізуіне кедергі келтіруі мүмкін.
Фото: pavon.kz
