Қазақстандағы утильалым тарифі: министрлік маңызды мәлімдеме жасады
Қазақстанға сырттан әкелінген көліктерді жаңадан тіркету құны арзандамайтын болды. ҚР Өнеркәсіп және құрылыс министрлігінде шетелдік тіркеудегі автокөлікті заңдастыру мәселесі бойынша бастамашыл азаматтар тобымен кездесу өтті, деп хабарлайды Qazaq.today агенттігі Azattyq Ruhyына сілтеме жасап.
Тарифті төмендету туралы өтініш берушілермен кездесуге ҚР ӨҚМ Өнеркәсіп комитеті төрағасының орынбасары Шыңғыс Сүйінбаев, ҚР ЭБЖМ қалдықтарды басқару департаментінің директоры Динара Әжіғалиева, ҚР ҚМ Мемлекеттік кірістер комитетінің Кедендік бақылау департаментінің директоры Елдос Саудабаев, сондай-ақ ҚР ҰЭМ, ҚР ІІМ өкілдері, «Жасыл даму» АҚ өкілдері келіп, сұрақтарға жауап берді.
Кездесу барысында азаматтардың сатып алынған шетелдік көліктерді әкелу кезінде бастапқы тіркеу және қайта өңдеу алымдарының мөлшерлемесін төмендету жөніндегі сұрақтары мен ұсыныстары талқыланды.
«Мемлекеттік органдардың өкілдері бастамашыл топтың барлық ұсыныстарын мұқият тыңдап, көтерілген мәселелерге қатысты тиісті түсініктемелер берді. Министрліктің қабылданған шаралары отандық көлік өндірісін, сондай-ақ қалдықтарды өңдеу жөніндегі ішкі инфрақұрылымның бәсекеге қабілеттілігін жақсартуға бағытталған деген ұстанымы айтылды», — деді ҚР Өнеркәсіп және құрылыс министрлігінің баспасөз қызметі.
Билік өкілдері тариф құнын төмендетпеудің бірнеше себебін атады. Олардың пікірінше, бұл шешімдердің барлығы отандық автокөлік өндірісін дамытуға бағытталған.
«Кездесуге қатысушыларға тарифтерді төмендету қазіргі уақытта қарастырылмайтындығы, ал шетелдік автокөліктерді тіркеу кезінде төлемдердің болуы техникалық регламенттерге сәйкес келмейтін көлік құралдарының импортын шектеп қана қоймай, сонымен қатар жинақталған қаражатты отандық автокөлік өндірісін дамытуға бағыттау мақсатында қабылданғаны түсіндірілді. Айтылған проблемалық мәселелер тиісті мемлекеттік органдарды тарта отырып және қолында тиісті құжаттамамен атаулы түрде шешілуі тиіс екендігі атап өтілді», — делінген хабарламада.
