«Көліктегі нөмірдің орнына ASANALI деп жазылған»: Полиция түсініктеме берді

Қызылорда облысының полицейлері мемлекеттік нөмірдің орнына ASANALI деген жазуы бар көліктің облыста неге жүргені жайлы сұраққа жауап берді. Бұл туралы Qazaq.Today жазды.

Әлеуметтік желі қолданушылары ерекше нөмірлі, дәлірек айтсақ, тек ASANALI деген латын әріптері барCadillac Escalade көлігінің видеосын қызу талқылап жатыр.

Қызылорда облысының полицейлері Cadillac Escalade көлігінің мемлекеттік нөмірі стандартқа сәйкес келмегені үшін тоқтатылғанын түсіндірді.

«Белгілі болғандай, автокөлік актер, режиссер, кеңестік және қазақ киносы мен театрының профессоры, Қазақ КСР және КСРО халық әртісі, Мемлекеттік сыйлықтың лауреаты Асанәлі Әшімовтың туғанына 85 жыл толуына арналған деректі фильмді түсіру үшін пайдаланылады.

Оқиға орнында ескертуден кейін көлікке тиісті мемлекеттік белгі бекітілді», — деп түсіндірді облыстық полиция департаментіндегілер.