Димаш Құдайбергенге WBC құрмет белбеуі табысталды
19 қарашада Мехикодағы Palacio de los Deportes аренасында Димаш Құдайбергенге WBC құрмет белбеуі табысталды. Марапат әншінің халықаралық жетістіктері мен мәдениеттерді жақындастыруға қосқан үлесі үшін берілді.
Фото: dimashnews.com
19 қарашада Мехикодағы Palacio de los Deportes аренасында қазақстандық әнші Димаш Құдайбергенге Дүниежүзілік бокс кеңесінің (WBC) құрмет белбеуі табысталды.
Бұл туралы Qazaqtoday.info сайты хабарлайды.
Бұл марапат өнерпаздың халықаралық деңгейдегі жетістіктеріне және музыка арқылы түрлі елдер мен мәдениет өкілдерін жақындастыруға қосқан үлесіне берілген баға болды.
Белбеуді Дүниежүзілік бокс кеңесінің өкілдері кіші Гектор Сулейман, Хосе Антонио Арреола Сулейман, Виктор Сильва және Қазақстанның WBC-дегі өкілі Әлихан Жарылғапов табыстады.
Димаштың анасы, қазақстандық әнші Светлана Айтбаева Латын Америкасындағы концерттік сапар барысында бірқатар жағымды жаңалық болғанын атап өтті.
«Монтеррейде қазақстандық әншінің бейнесі салынған мурал пайда болса, Мехиконың орталығындағы Мексиканың көрнекті тұлғасы Венустиано Каррансаға арналған мұражайда Димаштың шығармашылығына арналған фотокөрме ашылды», — деді ол.
Сөзінше, көрмеге Қазақстанның Мексикадағы елшілігінің өкілдері де қатысқан.
