Қазақстан Словакиямен 2:2 есебімен тең түсіп, Лига нацийдегі топта соңғы орында қалды
Қазақстан құрамасы Лига нацийінің қорытынды матчында Словакиямен 2:2 есебімен тең ойнады. Айбол Әбікен соңғы минуттағы гол туралы пікір білдірді.
Фото: скриншот видео
Қазақстан құрамасы Лига нацийінің топтық кезеңінің қорытынды матчында Словакиямен 2:2 есебімен тең ойнады. Алтыншы турдың кездесуі 16 қарашада «Астана Арена» стадионында өтті.
Бұл туралы Qazaqtoday.info сайты хабарлайды.
Есепті 29-минутта Ислам Чесноков ашты. «Крылья Советов» шабуылшысы Ғалымжан Кенжебектің пасынан кейін допты қақпаға дәл бағыттады.
56-минутта словактар есепті қайтарды. Роберт Боженик әуедегі күресте Әділбек Жұмахановты ұтып, есепті теңестірді.
Алайда 65-минутта Қазақстан қайтадан алға шықты. Ян Вороговский Ғалымжан Кенжебектің пасынан кейін гол соқты, ол осы матчта екінші ассистін жасады.
Қазақстандықтар басымдықты компенсацияланған уақытқа дейін сақтап қалды, бірақ 95-минутта Адриан Капралик алыстан ұшып келе жатқан допты қақпаға дәл бағыттап, қорытынды есепті – 2:2 орнатты.
Қазақстан құрамасының жартылай қорғаушысы Айбол Әбікен «Qazsport» телеарнасына Лига нацийі-2026/27 қорытынды турындағы Словакиямен матчтың соңы туралы пікір білдірді.
«Көңіл-күй жоқ. Соңғы минуттарда жеңісті жоғалтып алдық. Өкінішті. Менің ойымша, біз өте жақсы ойнадық. Бұл футбол, соңғы минуттарда гол жіберіп алу болады. Мүмкін, біз концентрацияны жоғалттық. Бәлкім, жеңіске тым ерте сендік. Менің ойымша, себеп осында», — деді Әбікен матчтан кейін.
Осылайша, Қазақстан құрамасы C3 тобындағы өнерін төрт ұпаймен аяқтап, соңғы, төртінші орынды иеленді. Словакия 12 ұпай жинап, топ жеңімпазы атанды.
