Рыбакина, Соболенко және Андреева қорытынды турнирдің жүлде қорын білді

Сурет: sports.kz

АҚШ-тың Индиан-Уэллс қаласында өтетін WTA-ның 2026 жылғы қорытынды турнирінің жалпы жүлде қоры өткен маусыммен салыстырғанда айтарлықтай қысқарды. Бұл жарыста әлемнің бірінші ракеткасы, қазақстандық теннисші Елена Рыбакина сынға түседі.

Бұл туралы Qazaqtoday.info сайты хабарлайды.

Жалпы сыйақы мөлшері 15,5 миллион доллардан 10 миллион долларға дейін төмендеді, яғни 5,5 миллион долларға немесе шамамен 35,5 пайызға азайды. Жекелей сында қатысушылар 8 миллион долларды бөліп алады, ал жұптық разрядта 2 миллион доллар ойнатылады.

Жекелей турнирдің жеңімпазы барлық бес матчты ұтып, 3,37 миллион доллар табады. Өткен жылы Рыбакина Эр-Риядтағы қорытынды турнирді жеңіліссіз өтіп, 5,235 миллион доллар алған болатын. Осылайша, чемпионға берілетін ең жоғары төлем 1,865 миллион долларға қысқарды.

Топтық кезеңдегі барлық үш матчқа қатысқаны үшін 220 мың доллар қарастырылған, топтағы әрбір жеңіс үшін тағы 230 мың доллар беріледі. Жартылай финалдағы жеңіс қосымша 820 мың доллар әкелсе, финалдағы жеңіс 1,64 миллион долларға бағаланады.

Рейтингтік ұпайлар саны өзгерген жоқ: жеңіліссіз чемпион 1500 балл алады. WTA-ның қорытынды турнирі 8-15 қараша аралығында өтеді, ал Рыбакина жарыстың қазіргі жеңімпазы мәртебесінде өнер көрсетеді.

Рыбакина бірінші топта американдық Кори Гауффпен (әлемнің 4-ракеткасы), Джессика Пегуламен (5-ші) және чехиялық Линда Носковамен (8-ші) бірге ойнайды. Екінші топта беларусьтік Арина Соболенко (2-ші), ресейлік Мирра Андреева (3-ші), украиналық Элина Свитолина (6-шы) және чехиялық Каролина Мухова (7-ші) сынға түседі.