Алматыда автобус күтіп отырған әйелдің үстіне аялдама әйнегі құлады
Фото: Видеодан скрин
Алматыда автобус күтіп тұрған әйелдің үстіне аялдама әйнегі құлап, күртешесі жыртылды. Оқиғаға қатысты аудан әкімдігі түсініктеме берді, деп хабарлайды Qazaqtoday.info.
Оқиға Мақатаев пен Назарбаев көшелерінің қиылысында болған. Әйелдің айтуынша, автобус күтіп тұрған сәтте аялдаманың әйнегі кенеттен үстіне құлаған. Абырой болғанда, өзі жарақат алмағанымен, сырт киімі бірнеше жерінен жыртылған.
Алмалы ауданының әкімдігі павильонға жауапты RTS компаниясымен байланысқанын мәлімдеді. Компания зақымданған әйнекті ертеңге дейін ауыстырып, оқиғаның себебін тексеруге уәде берген.
Сондай-ақ жөндеу жұмыстары аяқталған соң фотоесеп ұсынылады. Әкімдік жағдайды бақылауда ұстайтынын жеткізді.
