Қырғызстан Қазақстанның көшпенділер ойындарындағы жеңісін мойындады
Қырғызстан президентінің баспасөз хатшысы VI Дүниежүзілік көшпенділер ойындарында Қазақстанның бірінші орын алғанын мойындады. Медаль есебіндегі техникалық қателік түзетілді.
Сурет: aikyn.kz
Қырғызстан президентінің баспасөз хатшысы Асқат Алагөзов VI Дүниежүзілік көшпенділер ойындарының қорытынды медаль есебінде Қазақстанның бірінші орын алғанын ресми түрде мәлімдеді.
Бұл туралы Qazaqtoday.info сайты хабарлайды.
Оның айтуынша, жалпыкомандалық есепті шығару барысында медальдарды санауда техникалық қателік орын алған. Бүгін ұйымдастыру комитеті Қазақстанның үш спортшысы жеңіп алған медальдарды жеке-жеке есепке алу туралы шешім қабылдады. Нәтижесінде, қайта есептеуден кейін Қазақстан жалпыкомандалық есепте көш бастады.
– Осылайша, жалпыкомандалық есепте бірінші орынды Қазақстан иеленді. Қазақ бауырларымызды жеңісімен құттықтаймыз! – деді Асқат Алагөзов.
Бұған дейін ойындардың қорытынды медаль есебіне қатысты екі түрлі ақпарат тараған еді. Қазақстан тарапы ұлттық құраманың 32 алтын, 20 күміс және 22 қола, барлығы 74 медаль жеңіп алып, бірінші орынға шыққанын хабарлады. Ал ұйымдастырушылар жариялаған кестеде Қазақстанға 29 алтын есептеліп, Қырғызстан бірінші орынға қойылған болатын. Кейін бұл кесте ресми парақшадан өшірілді.
VI Дүниежүзілік көшпенділер ойындары Қырғызстанда 31 тамыз бен 6 қыркүйек аралығында өтті.
